Seed to Cup 係咩?由種子到杯的全流程
Seed to Cup 全流程解密:產量換算、處理法科學、10-12% 含水率、杯測評分與烘焙化學——啡農實驗室系列嘅全流程總覽,16 篇專題目錄。

作者:Mike Sim|CQI Q-Grader
「Seed to Cup」唔止係品牌名,係咖啡由一粒種子去到杯裡嘅完整旅程。呢個系列我哋會用科學角度,逐個階段拆解:點解要咁種、咁處理、咁烘,每一步背後嘅原理,同埋香港呢個非典型產地喺每一步面對嘅現實。先由全流程同幾個關鍵數字開始。
一棵成熟嘅 Arabica 咖啡樹,一年產量大約 2 至 5 公斤櫻桃;業界常講 5 至 6 公斤熟櫻桃先出到 1 公斤生豆——FAO 對 Arabica 嘅平均估算係 16.5%,精品級、篩選極狠嘅批次甚至去到 8:1 或更高。生豆烘焙後再跌約 15% 重量:一公斤生豆得返約 850 克;用傳統 7g 單份沖 espresso,大約沖到 120 杯(今日多用 18g 雙份,約 45 杯)。每個階段嘅決定,都決定最後杯裡面係咪好咖啡。
第一步:由一粒種子開始
好多人唔知:咖啡豆其實係種子。剖開一顆咖啡櫻桃,由外到內係果皮、果肉、果膠黏液層、羊皮層、銀皮,最入先係種子。帶住羊皮層嘅種子可以發芽成苗,一般要三四年先開始結果,第五年先有像樣嘅商業產量。
啡農嘅種植由粉嶺 O-Farm 嘅 Arabica Caturra 開始——呢個品種喺香港小農場嘅環境下穩定、風味乾淨,係本土實驗嘅基礎。
花、果同成熟期
Arabica 由開花到果實成熟一般需要 7 至 9 個月:四月一場「blossom rain」觸發滿園白花,花落之後果實慢慢由青轉黃再轉紅,糖分同酸質喺果實入面逐月累積。溫度越高、越穩定,成熟越快;日夜溫差大,風味累積越多。
香港位處北緯 22.3°,貼住咖啡帶(南北緯 23.5°)邊緣,但海拔、溫度同雨量都同埃塞俄比亞等典型產區好唔同——成熟期同風味表現自然有自己嘅節奏。
採收:品質由第一個決定開始
採收嘅原則全球一致:只摘全紅果。未熟果令杯中帶草青味,過熟果會提前發酵。專業農場會用糖度計(Brix)量度櫻桃成熟度,並以浮水測試篩走密度不足、蟲蛀或空心嘅果實。
喺啡農農場,櫻桃平均糖度約 22 Brix,每個批次都會記錄重量、浮果率同糖度。兩年收成記錄:2021 年 28 公斤櫻桃只出得 3 公斤生豆(10.7%)、2022 年 35 公斤出 4.2 公斤(12%)——比業界平均低,因為每批先行浮水篩走約兩成浮果,再手工挑豆,企喺精品級狠篩嗰端。
處理法:同一批果,三種未來
採完摘,農夫要選擇點樣將果實變成生豆。全球主流係三大處理法:水洗(去皮後發酵分解果膠再洗淨,乾淨明亮)、日曬(整果連皮乾燥,果香濃郁但風險高)、蜜處理(保留部分果膠直接乾燥,甜感圓潤——保留率由約 20% 到 80%,業界用白、黃、紅、黑蜜區分,屬慣例而非統一標準)。
水洗發酵嘅科學:微生物分解果膠同時產生乳酸等有機酸,pH 由約 5.5-6.5 跌落嚟;業界普遍以 pH 4.2 至 4.6 作為完成指標,跌到 4.0 以下就有過度發酵風險。近年仲有厭氧發酵、接種發酵等創新做法——呢個領域正係啡農最落力研究嘅部分,包括以本地食材同微生物做嘅小批次實驗。
乾燥:穩定壓倒一切
乾燥嘅目標係將含水率由約 50-60% 穩定降至 10-12%——呢個係業界公認嘅安全儲存範圍:太濕會繼續發酵甚至霉變,太乾會令風味流失。乾燥過程要控制濕度、溫度同陽光強度,急速乾燥會令豆身內外不均。
香港全年濕度高,日光乾燥唔穩定,所以我哋用低溫乾果機,以約 30°C 慢烘 50 至 100 小時——要嘅唔係快,係每批都達標。
脫殼、分級同靜置
乾完嘅咖啡仲要脫殼去除羊皮層、篩走缺陷豆。生豆評估三大指標:含水率(10-12%)、密度(反映生長條件同營養分佈)、豆型大小(用篩網分級)。主要缺陷如全黑豆(真菌、過度發酵)同全酸豆會直接影響杯質。
脫殼後生豆要靜置 30 日至 3 個月,讓水分同風味穩定,先適合杯測同烘焙。
杯測:客觀評分
生豆好唔好,最終由杯測決定。標準杯測流程將多個樣本並排,以相同研磨、相同水溫同時間沖煮,評分者對香氣、風味、酸質、醇厚度等逐項評分。啡農每年嘅小批次杯測就係咁做:同一烘焙條件先有可比性,2021 年四個處理法批次由 80 分至 83 分逐分拆解,先知道邊個處理法真正做出風味。
呢套感官評估系統亦係 Q-Grader 認證嘅核心——一杯咖啡好唔好,唔靠感覺,靠標準。
烘焙與沖煮:最後一公里
烘焙將生豆變成咖啡。脫水階段之後,梅納反應(約 140-165°C 最活躍)令氨基酸同還原糖結合,產生堅果、麥香同焙烤風味;之後焦糖化帶嚟更深沉嘅甜苦層次。一爆(約 196-205°C)同二爆(約 224-230°C)係烘焙度嘅兩個里程碑。烘焙完嘅咖啡仲要養豆排氣,新鮮度決定杯中表現。
到呢一步,一粒種子先真正完成旅程。呢個系列會逐階段深入,每篇獨立可讀。
常見問題
Q:Seed to Cup 係咩?
A:一條由咖啡種子去到杯中嘅完整品質鏈:種植、處理、乾燥、杯測、烘焙。
Q:香港種到咖啡嗎?
A:可以——香港喺咖啡帶邊緣(22.3°N),用微氣候設計種 Arabica Caturra。
Q:呢個系列有幾多篇?
A:16 篇專題+本篇總覽,每篇獨立可讀,見下面目錄。
啡農實驗室 · 全系列目錄
認識咖啡果
田間到入廠
處理法
後製到杯
另收
參考資料
- World Coffee Research — 品種資料庫與栽培研究(品種、生長條件)
- FAO(聯合國糧食及農業組織)— 採收指引、Arabica 產量換算、生豆儲存時限
- Codex Alimentarius — 生豆含水率上限(12.5%)與真菌安全準則
- Cenicafé(哥倫比亞咖啡研究中心)— 發酵 pH、乾燥、靜置與濕處理用水研究
- SCA(精品咖啡協會)— 杯測協議(2004 Legacy)與 Coffee Value Assessment(2024)
- CQI(Coffee Quality Institute)— Q-Grader 認證體系(2004-2025)
- 學術文獻
Coffee fermentation: A survey of process
Coffee Fermentation: From Spontaneous Microbial Succession to Controlled Fermentation
Coffee fermentation from traditional to controlled process: A review
The essential role of spontaneous and starter yeasts in cocoa and coffee fermentation
Flowering and Fruiting of Coffea arabica L.
Acids in coffee: A review of sensory and instrumental findings - 啡農農場記錄 — 批次處理數據、杯測分數、收成統計(2021-2024)
由種子到杯,親身體驗啡農
想由一粒種子開始認識香港咖啡?農場導覽、採後處理示範到杯測工作坊,親手行一次整條鏈。