香港咖啡沖煮大賽2025：首次本地咖啡豆參賽之旅

作為香港嘅農夫（種植者/生產者），竟然有份參加今年2025香港咖啡沖煮大賽，真係從來冇諗過。

香港咖啡沖煮大賽簡介

香港咖啡沖煮大賽每年一度, 由香港精品咖啡協會 SCA 主辦, 喺PMQ元創方舉行, 冠軍獎代表香港參加世界比賽.

比賽緣起：First Crack by Summerice

事情發生喺半年前某日，我間中會帶工作到咖啡店，多數係casual meeting，一來環境舒適，二來支持一下朋友。而通常傾完正經事後就轉為傾咖啡。我當日去咗First Crack，朋友喺中環開嘅一間精品小店。店主Frank示範咗佢嘅新dripper設計，試住又傾到咖啡處理、發酵等課題。最後唔知點解提出咗比賽念頭，以咖啡甜感做主角，要用技巧令厭氧發酵嘅咖啡都能沖出較高嘅甜度，達到酸甜平衡。

香港咖啡豆的挑戰

老實說，間中都有咖啡師表示有意用香港種植咖啡豆參加比賽，但由於都係實驗性質，產量少，款式多引致每款批次嘅份量更少，只適合做杯測試味。所以過去我都未能夠支持參賽者。

認識Frank好一段時間，佢都好了解本地產量問題同啡農做咖啡嘅方法。當日好快就決定咗拼配，一個對我嚟講好複雜嘅烘焙同沖煮方法，即係話佢俾咗一個更大嘅挑戰自己。

咖啡豆選擇與準備過程

低產量多款式變成第一個難關，點樣喺二十多種處理法中搵出啱比賽用嘅批次？我哋先做咗一場公開杯測，用咗八款唔同發酵嘅咖啡豆同大家一齊試飲同了解背後嘅概念。

杯測後大概有個概念，Frank提出再調整烘焙曲線一試。冇錯，佢將炒豆都交埋俾我。我一直只係追求將咖啡豆都中肯如實咁炒同沖俾大家試味，今次係少數為特定沖煮方法去調整烘焙曲線。

創新發酵處理方法

最後我哋揀咗兩隻風味與故事並重嘅處理法：

1. 咸酸菜發酵：加入「鄉騲習作」Rebecca嘅咸酸菜，借來嘅乳酸菌發酵本地咖啡
2. Mossto發酵：每年我都會製作厭氧發酵，得出嚟嘅酵素可以保存。Mossto發酵指發酵時加入上年Mossto，保持風味嘅一致性。
3. 拼配上Columbia Finca El Diviso Sidra厭氧日晒，甜度高，帶荔枝、桃味

新dripper都再改設計並命名做slow cracker，調整咗坑道同外型，流速會隨水位改變。

比賽挑戰與結果

比賽前一星期Frank不幸感染咗，喺冇味覺之下準備比賽實在好難，我只能講「贏就你嘅，輸就當我嘅」。

結果雖然未能入到決賽，但係已經喺比賽歷史上寫咗紀錄，2025年6月14日第一次有咖啡師用香港咖啡豆參賽。多謝First Crack Frank嘅信任同半年來嘅精力帶啡農咖啡豆上比賽舞台，對我來說都係好好嘅經驗，可以重新思考香港咖啡豆嘅定位。